[116] อนิทสฺสนอปฺปฏิฆํ จิตฺตสมุฏฺฐานํ ธมฺมํ ปฏิจฺจ นอนิทสฺสนอปฺปฏิโฆ โนจิตฺตสมุฏฺฐาโน ธมฺโม อุปฺปชฺชติ เหตุปจฺจยา… เหตุยา ฉฯ

22-61. สนิทสฺสนตฺติก-จิตฺตสหภูทุกํ

[117] อนิทสฺสนอปฺปฏิฆํ จิตฺตสหภุํ ธมฺมํ ปฏิจฺจ นอนิทสฺสนอปฺปฏิโฆ โนจิตฺตสหภู ธมฺโม อุปฺปชฺชติ เหตุปจฺจยา… เหตุยา ฉฯ

22-62. สนิทสฺสนตฺติก-จิตฺตานุปริวตฺติทุกํ

[118] อนิทสฺสนอปฺปฏิฆํ จิตฺตานุปริวตฺติํ ธมฺมํ ปฏิจฺจ นอนิทสฺสนอปฺปฏิโฆ โนจิตฺตานุปริวตฺตี ธมฺโม อุปฺปชฺชติ เหตุปจฺจยา… เหตุยา ฉฯ

22-63-65. สนิทสฺสนตฺติก-จิตฺตสํสฏฺฐสมุฏฺฐานาทิทุกานิ

[119] อนิทสฺสนอปฺปฏิฆํ จิตฺตสํสฏฺฐสมุฏฺฐานํ ธมฺมํ ปฏิจฺจ นอนิทสฺสนอปฺปฏิโฆ โนจิตฺตสํสฏฺฐสมุฏฺฐาโน ธมฺโม อุปฺปชฺชติ เหตุปจฺจยา… เหตุยา ฉฯ

[120] อนิทสฺสนอปฺปฏิฆํ จิตฺตสํสฏฺฐสมุฏฺฐานสหภุํ ธมฺมํ ปฏิจฺจ นอนิทสฺสนอปฺปฏิโฆ โนจิตฺตสํสฏฺฐสมุฏฺฐานสหภู ธมฺโม อุปฺปชฺชติ เหตุปจฺจยา … เหตุยา ฉฯ

[121] อนิทสฺสนอปฺปฏิฆํ จิตฺตสํสฏฺฐสมุฏฺฐานานุปริวตฺติํ ธมฺมํ ปฏิจฺจ นอนิทสฺสนอปฺปฏิโฆ โนจิตฺตสํสฏฺฐสมุฏฺฐานานุปริวตฺตี ธมฺโม อุปฺปชฺชติ เหตุปจฺจยา… เหตุยา ฉฯ

22-66. สนิทสฺสนตฺติก-อชฺฌตฺตทุกํ

[122] อนิทสฺสนอปฺปฏิฆํ อชฺฌตฺติกํ ธมฺมํ ปฏิจฺจ นอนิทสฺสนอปฺปฏิโฆ นอชฺฌตฺติโก ธมฺโม อุปฺปชฺชติ เหตุปจฺจยาฯ อนิทสฺสนอปฺปฏิฆํ อชฺฌตฺติกํ ธมฺมํ ปฏิจฺจ นสนิทสฺสนสปฺปฏิโฆ นอชฺฌตฺติโก ธมฺโม อุปฺปชฺชติ เหตุปจฺจยา…เป.… อนิทสฺสนอปฺปฏิฆํ อชฺฌตฺติกํ ธมฺมํ ปฏิจฺจ นสนิทสฺสนสปฺปฏิโฆ นอชฺฌตฺติโก จ นอนิทสฺสนสปฺปฏิโฆ นอชฺฌตฺติโก จ ธมฺมา อุปฺปชฺชนฺติ เหตุปจฺจยา… เหตุยา ฉฯ อารมฺมเณ ตีณิ…เป.… อวิคเต ฉฯ

อนิทสฺสนสปฺปฏิฆํ พาหิรํ ธมฺมํ ปฏิจฺจ นสนิทสฺสนสปฺปฏิโฆ นพาหิโร ธมฺโม อุปฺปชฺชติ เหตุปจฺจยา… เหตุยา เอกาทสฯ

22-67. สนิทสฺสนตฺติก-อุปาทาทุกํ

[123] อนิทสฺสนอปฺปฏิฆํ อุปาทา ธมฺมํ ปฏิจฺจ นสนิทสฺสนสปฺปฏิโฆ โนอุปาทา ธมฺโม อุปฺปชฺชติ เหตุปจฺจยา… เหตุยา ตีณิฯ

อนิทสฺสนสปฺปฏิฆํ โนอุปาทา ธมฺมํ ปฏิจฺจ นอนิทสฺสนสปฺปฏิโฆ นโนอุปาทา ธมฺโม อุปฺปชฺชติ เหตุปจฺจยา… ฉฯ

อนิทสฺสนอปฺปฏิฆํ โนอุปาทา ธมฺมํ ปฏิจฺจ นอนิทสฺสนอปฺปฏิโฆ นโนอุปาทา ธมฺโม อุปฺปชฺชติ เหตุปจฺจยา… ฉฯ

อนิทสฺสนสปฺปฏิฆํ โนอุปาทา จ อนิทสฺสนอปฺปฏิฆํ โนอุปาทา จ ธมฺมํ ปฏิจฺจ นสนิทสฺสนสปฺปฏิโฆ นโนอุปาทา ธมฺโม อุปฺปชฺชติ เหตุปจฺจยา… ฉฯ เหตุยา อฏฺฐารสฯ

22-68. สนิทสฺสนตฺติก-อุปาทินฺนทุกํ

[124] อนิทสฺสนอปฺปฏิฆํ อุปาทินฺนํ ธมฺมํ ปฏิจฺจ นอนิทสฺสนอปฺปฏิโฆ นอุปาทินฺโน ธมฺโม อุปฺปชฺชติ เหตุปจฺจยาฯ อนิทสฺสนอปฺปฏิฆํ อุปาทินฺนํ ธมฺมํ ปฏิจฺจ นสนิทสฺสนสปฺปฏิโฆ นอุปาทินฺโน ธมฺโม อุปฺปชฺชติ เหตุปจฺจยา…เป.… อนิทสฺสนอปฺปฏิฆํ อุปาทินฺนํ ธมฺมํ ปฏิจฺจ นสนิทสฺสนสปฺปฏิโฆ นอุปาทินฺโน จ นอนิทสฺสนสปฺปฏิโฆ นอุปาทินฺโน จ ธมฺมา อุปฺปชฺชนฺติ เหตุปจฺจยา… เหตุยา ฉฯ

[125] สนิทสฺสนสปฺปฏิโฆ อนุปาทินฺโน ธมฺโม นสนิทสฺสนสปฺปฏิฆสฺส นอนุปาทินฺนสฺส ธมฺมสฺส อารมฺมณปจฺจเยน ปจฺจโยฯ (สํขิตฺตํฯ) อารมฺมเณ นวฯ

22-69-82. สนิทสฺสนตฺติก-อุปาทานาทิทุกานิ

[126] อนิทสฺสนอปฺปฏิฆํ อุปาทานํ ธมฺมํ ปฏิจฺจ นอนิทสฺสนอปฺปฏิโฆ โนอุปาทาโน ธมฺโม อุปฺปชฺชติ เหตุปจฺจยา… เหตุยา ฉฯ

[127] อนิทสฺสนอปฺปฏิฆํ กิเลสํ ธมฺมํ ปฏิจฺจ นอนิทสฺสนอปฺปฏิโฆ โนกิเลโส ธมฺโม อุปฺปชฺชติ เหตุปจฺจยา… เหตุยา ฉฯ

22-83. สนิทสฺสนตฺติก-ทสฺสเนนปหาตพฺพทุกํ